皇家馬德里最近贏到唔曉停，家陣已經西甲締造11連勝佳績，個勢咁猛，「銀河艦隊」又點會呢個關鍵時刻畀佢停？就算皇馬今晚人腳不整，造訪攻又唔得、守又唔掂桑坦德一樣夠殺，亨格比利要1.85倍「讓球客勝」。（now634台周一凌晨1:00直播）

    今季西甲爭霸戰係史上最激一屆，未計尋晚戰果，皇馬同巴塞隆拿仲係同分，「國家打」下個禮拜就殺到埋身，所以就算桑坦德係屎波，「銀河艦隊」都有必要Keep住個勢贏鑊甘，硬撼巴塞前保持最強氣勢。

    桑坦德攻守都唔掂

    亨格比利「白軍」今仗有沙治奧拉莫斯同沙比阿朗素停賽，兩人位置預計會由艾比路亞同古迪取代。況且希古恩、C朗拿度同雲達華治呢班弗友肯定擔正，戰鬥力同鬥心俱備。
 
    主隊桑坦德有降班危機，奈何隊波依然死氣沉沉，連練普迪高都冇符。佢近10場聯賽只係贏得1次咁大把，當中有7場入唔到波添，就連新星簡拿利斯最近都跌晒Watt，真係神仙都難救。最大鑊係托利莊、軒歷基阿祖安奴同奧利奧爾分別因傷停問題缺陣，霎時間冇晒3位後防大將，試問點頂得住皇馬進襲先？

    皇馬對上10仗場場都攻入3球或以上，桑坦德攻守兩瓣都咁削，真係睇唔出佢憑咩爆冷，莫講話破蛋，唔使輸到「客其他」都偷笑啦！