「金絲雀」今季重新起飛，暫時排英甲榜首，上場波佢慘被球證艾達頓屈死，成班球員谷埋成肚火，今晚回師主場實搵一盤散沙史托港出氣，翁文成睇好諾域治可以大捷，捧1.5倍「讓球主勝」。（開賽時間：周一晚10:00）

    近15主場贏14仗

    上星期六諾域治作客1:3輸畀燦美爾，戰果令唔少球迷跌眼鏡，查實呢場波佢晨早就輸兩個12碼、門將費沙科士打又被逐，燦美爾攻入第3球更加係犯手球在先，難怪諾域治領隊林拔鬼咁勞氣，喪插球證艾達頓亂。好彩有復活節快車，等諾域治即刻可以搵史托港出氣。「金絲雀」對上15仗英冠主場贏14場，一對箭頭格連荷特同基斯馬田都起晒Cue，成隊波得小將哥利史密夫一件傷兵，今鋪可強陣應戰。

    對家史托港係包尾大幡，領隊艾比列治坦承陣營士氣沉過沉船，入到更衣室都唔知講咩鼓勵說話好，成班波死氣沉沉等降班，造訪諾域治唔慌有運行。