上星期英超有單幾無謂新聞，就係韋斯咸投訴富咸放水畀護級對手侯城，不過仲記得幾個月前狼隊自殺式排弱陣輸畀曼聯，最終都係不了了之，「錘仔幫」今次控訴睇怕都係唔成立居多，想護級都係靠自己啦。

    帶領富咸做盃賽專家

    富咸既要分心歐霸盃8強大戰，又唔愁護級，筆者覺得佢聯賽唔出預備組球員已經好畀面，周日佢對韋根一戰，領隊鶴臣似乎有多少回應韋斯咸訴求，只係抽起有輕傷射手森莫亞，球員亦無懼周中歐霸盃次回合要作客禾夫斯堡，踢起毫無保留，結果韋根就變成犧牲品輸波而回。

    姑勿論富咸會唔會因為冇留力而影響歐霸盃出線機會，但領隊鶴臣今季戰績已經值得大家拍爛手掌，富咸自從由呢位前芬蘭國家隊主帥接手之後，由長期護級變身為聯賽中堅分子，今季以極有限資源都去到足總盃及歐霸盃8強階段，絕對係超高難度動作，比起今季未見突出big3主帥，鶴臣似乎更有條件問鼎今季英超最佳領隊，難怪佢同類型投票都名列前茅。