南美自由盃分組賽去到最後階段，D組秘魯體育大學聽朝只要主場擊敗篤定出局玻利維亞球隊邦明，就即刻可以提早出線，鬥志同質素都秤先，1.5倍「讓球主勝」雖然唔算好分，但勝在穩陣嘛！（開賽時間：周三早上9:30）

    秘大係秘魯國內第一大球會，整體實力雖然未達南美頂級，不過對住玻利維亞三流貨色，肯定夠殺有餘。佢現時以4戰得8分不敗戰績排D組次席，只係落後利伯泰迪1分，但就踢少一場，由於第3位拉魯斯只係得7分，換句話講，秘大今晚贏波即可提早出線。

    邦明4戰全敗篤定出局

    雖然秘大4戰入5球唔算多，今季仲要放走埋前紐卡素球星蘇蘭奴，但5個入球其實自5個不同球員，證明佢得分點多，根本唔易防範，以邦明4戰失11球豆腐防線睇，真係頂到半場都頂唔到全場！

    來自玻利維亞邦明，早兩年連踢南美球會盃都踢唔掂，更何況係更高級別自由盃！佢至今4戰全敗，僅入2球失11球，擺明係唔夠班。最有名氣球員，已經係過香港落班玻利維亞國腳艾法度卡斯迪路，不過想當日連南華都唔要佢，有幾多料都毋須多講。加上隊波已經出局，搏無謂，近6場又錄得1和5負劣績，今場都係輸少當贏啦！