歐聯八強次回合最後一日長假期深夜上演，「地上最強」巴塞隆拿主場出戰阿仙奴。睇完首回合後，相信好多球迷會覺得阿仙奴好似細路對大人咁冇得打，但踢波係一場還一場，而且足球足彩最重要係計值博率，今場主W得1.28倍唔單止乏味，更係對阿仙奴侮辱，樂比仔相信阿仙奴就算輸都會輸得好好睇睇，實行風光大葬，不妨改捧大盤。

    （有線足球台61周三凌晨2時45分直播）

    巴塞兩大中堅停賽

    阿仙奴首回合最終雖然主場追和二比二，但確實陷於劣勢，尤其係上半場，全靠血肉長城陣先頂得住唔失波。睇番上場統計數據，巴塞射門多達二十三次，而阿仙奴僅得六次，而巴塞控球比率亦高達六成五。好多人都認為兩隊根本唔係同一個檔次，但足球最重要始終係戰果，阿仙奴首回合處下風仍力保不敗，其實已經成功一半！

    當然，樂比仔認同阿仙奴整體實力唔及巴塞，但巴塞亦非全無弱點，尤其係防守上，上仗竟然畀機會唔多阿仙奴攻入兩球，今場更有正選中堅佩奧爾及碧基停賽，面對個人技術極高拿斯尼、突破能力極強禾確特同有高空優勢賓特拿，樂比仔認為巴塞未必可保持清白之身。

    何況進攻方面，上仗梅開二度伊巴謙莫域因傷倦勤，亨利又因狀態問題，今場會續任後備，恩尼斯達上陣機會亦係五五波，新仔保贊、柏度洛迪古斯面對英超球隊硬淨防守，能否踢出水銀瀉地攻勢，實在存有疑問。

    阿仙奴死球搵到食

    最重要係巴塞上仗取得兩個作客入球，今場即使○比○都可晉級，根本冇必要贏，雖然巴塞踢法一向唔會咁保守，但對住唔會冒險搶攻阿仙奴，咬唔入亦好正常，加上巴塞周末要硬撼皇家馬德里，呢場西甲冠軍前哨戰對巴塞極為重要，樂比仔認為巴塞今場贏波輸盤機會最高，而且亦有失波機會，故捧大盤最好。

    至於阿仙奴雖然有三大主力法比加斯、艾沙維及加拿斯缺陣，但「兵工廠」踢法向來注重整體，冇話冇邊個唔得，首回合後備入替射入一球禾確特，會成為阿仙奴今場撒手。而阿仙奴死球攻勢亦會係另一殺，話唔定今場臨危受命蘇甘保，會重演○六年歐聯決賽攻破巴塞大門一幕！