今晚英冠復活節賽期，名牌球隊紐卡素壓軸出擊，主場迎戰中游分子錫菲聯。紐卡素今場只要和波即可獲直接升班資格，不過並不減拿仁推介大盤信心，皆因「喜鵲」愈踢愈順，聯賽主場七連勝入廿五球，隊中攻擊球員晒火，自己一隊都夠開大喇！（now 825周二凌晨2時45分直播）

    紐卡素今季於英冠明顯超晒班，依家佢領先第三位諾定咸森林十五分，後者剩番五場比賽，即係話紐卡素只要多一分已肯定升班，就算佢真係咁衰仔輸晒剩低六輪聯賽，由於佢得失球差比森林有超過廿球優勢，所以升班只係遲早問題。

    紐卡素今季主場聯賽未輸過，二十戰十六勝四和，勝出率高達八成，確實犀利到暈。踢到季尾階段，全世界都知「喜鵲」主場惡，依家個主Ｗ例牌畀人壓低，今場主勝確實穩陣，但略嫌冇乜分頭，過關就可預埋佢。
 
    紐卡素射手安祖卡路爾有傷在身，但仲有大把人用，路蘭、艾美奧比、盧雲克蘭斯同約拿斯古迪利斯個個當弗，大軍聯賽主場七連勝，加埋轟入廿五球，確實非常驚人。再者，隊中兩大中堅史提芬泰萊同賀爾都有傷，擺明攻強守弱，捧入球大最好！

    森林跌Watt讓唔起卡城

    同日較早時間開波仲有一場前列對決，諾定咸森林主場對卡迪夫城。森林主場勝率同樣達到八成，但球隊近期揀波踢，完全放棄作客，留番主場先搏，球員窒住窒住令狀態明顯下滑。卡城近五戰不敗勢頭勁，要「讓球客勝」！（now 825周二凌晨零時15分直播）