早排同班Friend去唱通宵K，有幾位妹妹仔突然殺入撩我一齊玩，阿成咁好客當然來者不拒啦。其中1位叫阿橙女仔相當搶韁，喪跳扭腰舞之餘仲問阿成電話，見慣大場面我都畀佢嚇窒。

    後來聽佢班姊妹講，原來阿橙剛失戀，好想盡快搵番個拖友，唔怪得要搏晒老命取悅阿成啦！搏老命唔止阿橙，仲有北愛名將連儂，呢位些路迪看守領隊上仗首度領軍就開齋，腳頭相當唔錯。

    些路迪要爭蘇超錦標係好渺茫，不過連儂同助米贊比都要為份長約而努力，畢竟呢份工好多人吼住，唔搏命交出成績取悅球迷同高層點掂？隊長史葛布朗就話連儂係佢偶像，賽前仲呼籲隊友踢好波為連儂而戰，鬥心可以話係一流，造訪近9場聯賽有7場失分喜伯年，客W冇走雞啦！