樂比仔心目中嘅今季英超冠軍曼聯今晚壓軸登場，主場迎戰「喜鵲」紐卡素。曼聯今季最大優勢就係上季失落聯賽冠軍，飢渴感成為球員最大動力，加上曼聯銳意年輕化初見成效，相信今季表現會更具霸氣。紐卡素喺英冠就也文也武，但重返英超即刻由「喜鵲」變「鵪鶉」，樂比仔今仗強捧曼聯「讓球主勝」。（有線201台及301台周二凌晨3時直播）

    曼聯新秀有活力

    曼聯今季並冇大事擴軍，因為領隊費格遜對陣中年輕球員好有信心，佢認為達施華兄弟、吉遜、馬捷達、莊尼伊雲斯等新人已逐漸成熟，而新加盟嘅查維亞靴南迪斯及基斯史摩寧又極具潛質，單係呢班新人已經夠照！今季車仔實力削弱，曼聯絕對有機會重奪冠軍，冠軍有3倍可謂非常抵玩，即使要大半年後先可以收錢，但依然值得投注。

    講番今場波，樂比仔將會親自到奧脫福觀戰，仲會訪問領隊費格遜及其他曼聯球員。未抵達曼徹斯特之前，樂比仔對曼聯季前備戰作出詳細研究，曼聯近期可用一個字形容，就係「弗」，社區盾大勝車路士三比一，唔係運氣或對手唔認真，而係曼聯狀態真係好過車路士好多！縱使朗尼今仗未必出得，但都夠贏紐卡素。

    紐卡素回歸未夠班

    雖然曼聯曾經喺兩年前英超開鑼戰畀紐卡素逼和，不過當時紐卡素陣容似乎好過依家，而該仗曼聯亦缺少C朗、泰維斯同貝碧托夫，所以先大意失分。曼聯近年長期食住紐卡素，紐卡素對上一次喺奧脫福贏波，已經係一九七二年，而紐卡素開鑼戰成績亦一向唔多好，過去十一次開鑼戰僅贏過三場，呢啲數據絕對可增加球迷嘅信心。

    紐卡素最大隱憂就係防線，佢哋上季喺英冠習慣強攻對手，後防考驗根本唔大，但升番上英超之後，用番原有班底真係令人好擔心，當中主將史提芬泰萊今仗因傷缺陣，新加盟嘅蘇甘保又未有足夠比賽狀態，單靠高洛仙尼支撐大局，想唔出醜都難！