日職周中加開快車，川崎前鋒連續2場主場出擊，當然有着數，佢哋唔止係日職主場王，擁有73%得勝率，巴西箭頭連拿天奴扭計罷操嘅事件亦已告一段落，佢願意公開謝罪換取高層原諒，今晚川崎前鋒喺主場迎戰名古屋鯨魚，讓平半一於照追！（now633台周三晚6:00直播）

    近期連拿天奴失去正選位置，激到佢罷操抗議，結果前鋒日前迎戰廣島三箭，佢後備都冇份做，但前鋒一樣贏2:0。計晒今季聯賽主場7勝2和，上季聯賽主場12勝4和1負，近26場聯賽主場贏19場，得勝率達73%，日職冇球隊主場旺得過佢哋，連拿天奴知道自己玩唔過教練高 勉，惟有公開認衰。

    森巴箭頭入波多過鄭大世

    消息話，連拿天奴經已接受前鋒高層決定嘅罰款處分，而且前日佢歸隊練習，有球迷喺場邊掛起橫額，用葡文寫上「請連拿天奴留低，我哋好需要你」，搞到呢位巴西射手勁感動，唔好忘記，今季連拿天奴喺聯賽攻入7球，比起經已離隊嘅北韓國腳鄭大世入更多波，依家佢要用表現爭取出場時間，相信前鋒嘅攻擊力會更恐怖。

    鯨魚防中吉村倦勤

    除此之外，前鋒有中場谷口博之復操可以候命，鯨魚就有防守中場吉村圭司繼續養傷，形勢更有利，更何況近期為前鋒打雙中堅嘅井川祐輔同菊地光將身高達1米82，慣晒喺亞冠盃面對高大對手，對住鯨魚嘅1米94澳洲中鋒約舒亞堅尼地，唔見得太蝕底，有機會打斷對方嘅世盃後連續6場不敗走勢。