執起教鞭已經有27年嘅夏利列納，今晚會率領熱刺首度征戰歐聯，就連佢自己都話對呢個「第一次」好自豪。夏利叔有料就係人都知，據英格蘭足總消息，佢哋已經將卡比路接班人鎖定為本土領隊，63歲嘅夏利叔更加係頂頭大熱，真係愈老愈紅！

    年青人後衞係熱刺Fans

    英格蘭喺世盃表現濕滯，主帥卡比路最近仲先斬後奏逼碧咸退出國家隊，令到呢位「鐵腕主帥」嘅下台傳聞愈吹愈勁。英足總管理總監比雲頓表明，下任英格蘭領隊一定係本土教頭，消息一出，英國博彩公司William Hill即刻開盤，將夏利列納封為3.25倍大熱，就連咸哥亦都榜上有名。

    夏利叔愈老愈旺，接手熱刺之後搞到隊波有聲有色，今晚佢老人家就會帶隊出戰歐聯造訪年青人，唔講唔知，原來年青人嘅英格蘭右閘瑟達都係熱刺擁躉！瑟達賽前興奮表示：「當年青人抽到對熱刺之後，我開心到跳起揮拳，我喺倫敦長大仲買過熱刺季票，能夠同愛隊交手嘅感覺好特別。」