辛尼特明劏歐塞爾

    歐聯 （二）5 周三凌晨零時30分
Winning Bistro首次同大家見面，呢份Menu一次過提供周中連日推介，豐富可口。本周頭盤係歐聯附加賽首回合，辛尼特主場對歐塞爾，辛尼特級數佔盡上風，首回合主場勢必要搶到有利比分，主Ｗ同「讓球主勝」都可以捧場。 （有線61台直播）

    重磅收購實力大增

    辛尼特歐戰經驗足，○七年攞咗俄羅斯超級聯賽冠軍，跟手仲捧埋歐洲足協盃，之後經過兩季沉寂，今季矢志發圍，贊助商大灑金錢收購多名猛將，包括買入身價達二千二百萬歐元嘅葡萄牙國腳般奴艾維斯，同上季聯賽主要勁敵魯賓卡山嘅隊長施馬克，中場星級大將丹尼經過長時間養傷後復出，加上自意大利名帥史巴列堤上任後，幫助同鄉鋒將羅仙拿重生，球隊實力大幅提升，今季喺俄超十二勝四和未輸過，已經拋離莫斯科中央陸軍同魯賓卡山達七分之多，可以更集中精神應付歐聯賽事。

    歐塞爾實力平庸，上季只靠防守出色取得法甲季軍，今季既冇本錢增兵，開咧兩仗未贏過亦顯示狀態一般，作客注定做炮灰。
Main dish 主菜

    歐聯 （三）11 周四凌晨2時45分

    巴素利炒起舒列夫

    本周黑柴嘅主菜同樣係歐聯，瑞士巴素利聽晚迎戰摩爾多瓦舒列夫，舒列夫能夠打入附加賽已經還得神落，作客難敵級數同歐戰經驗都高兩班嘅巴素利，捧「讓球主勝」。

    舒列夫喺上圈遭遇克羅地亞球隊薩格勒布戴拿模，賽前已被睇淡，但結果主客兩場都踢成一比一平手，最終舒列夫憑互射十二碼獲勝晉級，不過黑柴睇咗佢哋次回合作客賽事，全場捱打其實應該輸咗好多次，全憑保加利亞門將史杜真奴域瘋狂撲救至僥倖過關，今仗遇上更強對手，作客想輸少啲都難。

    Dessert 甜品

    歐霸（四）6 周五凌晨零時45分

    史特加難贏施洛雲

    至於周中甜品就揀咗歐霸盃附加賽首回合，斯洛伐克球隊施洛雲主場對德甲勁旅史特加，史特加牌面佔優，不過黑柴對呢支慢熱青年軍有保留，施洛雲受讓捧得過。

    史特加近季都習慣遲發力，今季情況仲差，列文退休加上中場大將基迪拉轉投皇馬，令防線承受巨大壓力，上圈外圍賽兩回合合計只能以五比四險勝挪超弱旅莫迪，跟住德國盃面對新加入丙組嘅巴比斯堡仲要先失波然後險勝二比一，贏得肉酸，咁嘅狀態面對出名主場同防守都好嘅施洛雲，情況未許樂觀！