歐聯附加賽今晚續演首回合賽事，巨高推介布拉加主場對西維爾。布拉加上季於葡超取得亞軍，全靠穩健防守及快速反擊。預計教練杜明高斯仍會用相同戰術挑戰西維爾。留意到布拉加上季聯賽主場不敗，西維爾要以客隊身份贏波難度極高，今場寧捧1.5倍「讓球主勝」。 （有線64台周四凌晨2時45分直播）

    布軍上圈炒些路迪

    布拉加能取得葡超亞軍絕非符碌，上季曾於主場砌低賓菲加、波圖及士砵亭，賽績好值得尊重，新球季首場比賽延續主場強勢，以三比一擊敗樸迪莫倫斯，甚至喺較早前舉行嘅歐聯第三圈外圍賽，布拉加喺主場更以三比○擊敗蘇超班霸些路迪。基於近月已出戰過歐聯及葡超兩項正式賽事，布拉加球員已回復應有作戰狀態，加上本身有強勁主場賽績支持，面對西維爾絕對唔輸蝕。

    西維爾近期都算巴閉，西班牙超級盃首回合以三比一反勝巴塞隆拿，但要留意兩點，當日巴塞隆拿收起大量主力球員，仲要係作客出戰，西維爾獲勝欠說服力。

    同時，邊路球員艾迪安奴離開後，令西維爾側擊能力減弱不少，另外球隊去季客場演出只屬一般，去到AXA球場仲要讓波，點計都唔值博，情願熱捧1.5倍嘅布拉加「讓球主勝」。