换上新帅安察洛堤后踢出3连胜嘅巴黎圣日耳门（PSG），摆到明为争标遇神杀神，遇佛杀佛，超班实力加上无比决心，今晚作客比赛状态仍有待提升嘅比斯特，有望开出1.88倍客胜。（now714台及广东体育周日凌晨2:00直播）

有“法甲曼城”之称嘅PSG，上半季虽然带出，但由于赢得唔够清脆，富豪班主依然决定换帅，揾嚟前AC及车仔名帅肥安接手，对冠军自然志在必得。事实上，肥安上任亦即刻有货交，歇冬后踢咗2轮足总杯同1场联赛，全部赢晒，仲要系愈赢愈轻松，愈踢愈出色。
 
不断增兵逼球员搏命

虽然话阵内首席球星柏斯托尼今仗因伤缺阵，但整体实力仍喺比斯特之上，加上体育总监李安纳度仲不断增兵之中，寻晚仲话签得成阿历士洛里高，一众球员唔想第时冇咗正选位，仲点会唔搏命先？

位列11嘅比斯特其实今季表现唔曳，至今仲保持主场联赛不败！不过，佢哋近排有守将达夫、简达里、艾宾加同奥士文古巴利齐齐出战非国杯，防线要大执位，加上佢哋上星期冇份踢足总杯，歇冬重开后比赛唔多，状态应该未足，今晚对住班霸想话保住主场不败？恐怕难度唔细