皇家马德里今晚喺西甲主场对萨拉戈萨，即使“-2”都要照捧“让球主胜”，首先巴拿贝球场气势劲到冇朋友，今季主场接近70%至少净胜对手3球，其次萨拉戈萨出现球迷集体逼宫，要求会长伊格利西斯落台，简直输到乱晒龙，作客马德里惨败唔出奇。（now632台周日凌晨3:00直播）

银河舰队主场7成大胜

“银河舰队”喺西班牙杯被巴塞隆拿踢出局，肯定谷埋成肚火，睇番纪录皇马今季主场16战有11场至少赢3球，机会接近70%，而且现时皇马只系领前巴塞5分，为咗保住榜首优势冇咩失分空间，就算有翼锋迪马利亚、中场基迪拉同中坚卡维奴养伤，净系靠连续3场入波嘅C朗都够照啦！

另一方面，萨拉戈萨喺联赛长期包尾，今季踢咗19场得12分，睇落好难扭转降班厄运，所以近日有15,000个萨拉戈萨球迷发起抗议，要求会长伊格利西斯孭起黑镬落台，而且萨拉戈萨近5年先后有8个教头上任，明显内部管理有问题，搞极都冇起色，对住皇马边似有反抗能力？
横数千军

 皇马对赛胜率高
‧今季西甲下半场入波最多队伍，总共40球。
‧历来57次喺联赛主场斗萨拉戈萨赢咗47次。

 萨拉近8场联赛入2球

‧最近8场联赛只系入得2球。

‧迄今19场西甲赛事得4场保住清白之身