英格兰足总杯第四圈上演重头戏，利物浦主场对曼联，利物浦啱啱先喺周中嘅英联杯四强踢咗场硬仗，苦战之下两回合赢曼城三比二晋级，虽然赢波却要付出沉重代价，球员短期内踢两场大战肯定吃不消，平手盘乐比仔捧养精蓄锐嘅“红魔”曼联！（now 670及672周六晚8时45分直播）

利物浦周中英联杯四强主场逼和曼城二比二，呢场可以话系利物浦今季最重要嘅战役，因为现实啲讲，红军今季联赛无望，唔好话争欧联入场券，连欧霸入场券都好忟水，依家联赛杯成功杀入决赛，决赛只系面对低一级嘅英冠球队卡迪夫城，只要唔好学似旧年阿仙奴咁无用，大有机会打破锦标荒及取得欧洲赛资格，无论对球会及领队杜格利殊嚟讲，都可大大纾缓压力，变相令佢哋争夺足总杯嘅意欲削减！

撼完曼城比拿美挂彩

可能好多人认为，利物浦一向遇强愈强，今季对强队战绩强劲，先后赢过曼城、车路士同埋阿仙奴，加上今场有主场优势，平手盘可秤先，但乐比仔认为高手过招嘅“强强对话”，主场因素未必咁明显，何况今场仲系一场过嘅杯赛，以利物浦有限嘅兵力，加上呢队波往往只系踢道气，踢完上仗后元气大伤，搏得太尽嘅比拿美有微伤可能要抖，加上苏亚雷斯继续停赛，今仗对住实力强劲嘅曼联难以占到甜头。

曼联足总杯心存大欲

相比起利物浦，曼联更需要足总杯，因为佢哋喺欧联及联赛杯已出局，而联赛又畀曼城Head住，费格逊唔想今季两手空空，最好就系攞足总杯呢个安慰奖，从佢哋上圈淘汰曼城所见，费爵爷真系想捧呢个杯，以波论波，利物浦仲未系曼联嗰班，如果今场系联赛嘅话，乐比仔或会拣利物浦，但杯赛必捧“红魔鬼”！