力求卫冕英超嘅曼联今晚喺奥脱福主场迎战史笃城，咪以为佢哋主场巴闭同实力秤先，就实食冇黐牙，查实红魔近排表现反覆，加上兵源紧绌，嚟紧又恶战连场，领队费Sir派人或会有所保留，要做低出名硬净嘅史笃城肯定唔易。红魔让波，我建议大家冷敲4倍“让球客胜”！（有线200、300及广东体育周三凌晨4:00直播）

曼联硬仗连场或留力

红魔今季喺英超一直畀宿敌曼城带住走，目前踢咗22周落后“蓝月亮”3分，嚟紧自然不容有失。力奇唔怀疑费Sir求胜嘅决心，但就担心佢自视过高，唔会派最强阵容出战。事实上，红魔近排一直受伤兵问题困扰，就算话汤卡华利、路尔斯安达臣同艾舒利杨格都就嚟可以复操，但现阶段佢哋条中场线的确冇乜兵源调动。

史笃城近10战仅2败

要知道踢完今仗，曼联下轮联赛就系斗车路士，之后仲有欧霸杯要踢。相比起嚟，对史笃城表面似系较易执，费Sir或会派部分副选出战，诸如贝碧托夫同查维亚靴南迪斯等，佢哋都雪到冻晒，落到场未必有货交。至于后场又话有里奥费迪南伤愈复出，咪话力奇系曼联Fans都要泼冷水，里奥今季明显活力大减，有佢落场防线更加危危乎添！

史笃城呢边，家阵英超排第8，欧霸杯又话入到32强，表现绝对抵赞。呢支专踢高Q大棍嘅球队，胜在打法直接兼防守硬净唔易砌，近10战只系输过2场波，状态唔差。仲有，曼联上月底就试过喺奥脱福输畀布力般流浪，今次我唔贪心，博史笃城抢到1分已经有钱收。

横数千军

 红魔主场胜率得6成

‧历来英超3次主场斗史笃城全部获胜。

‧今季英超主场战绩仅列第3，胜率仅61%。

 史笃城作客4场不败

‧近10场英超取得5胜3和2负，不败率8成。

‧连续4场客战不败，近2战更未有失波