英超有冇黑金或者枱底交易，我冇能力话你知，不过保顿今晚喺英超主场对阿仙奴，教头奥云高尼赛前起势落嘴头，终于冧掂兵工厂领队云格外借宫市亮畀佢哋救亡，既然两队咁Friend底，今场简单啲捧阿仙奴1.58倍客W啦！（有线200、300及广东体育周四凌晨4:00直播）

据讲飞燕诺、华伦西恩斯同富咸都好有兴趣借用宫市亮，但最终都畀保顿成功借到佢返嚟帮手护级。由于亮仔都系属于高速型翼锋，揾佢顶替今季因断脚长抖嘅李青龙，简直最适合不过，依家真系借得成，正值3连胜嘅保顿嚟紧会踢得更醒神，护级成功绝对唔系奢望。

保顿近12次交手11败

或者就算保顿受咗恩惠借到宫市亮，你可能觉得佢哋唔会松3分畀兵工厂，但其实近12次对赛保顿得1胜11负，可以话畀对方恰到上心口，呢场拗气搏尽好可能嘥弹药，所以保顿留吓力，储够能源跟手再同诺域治斗过，都系顺理成章，讲到底，对诺域治抢分嘅机会，点都比对兵工厂大嘛。

阿仙奴亨利 阿迪达好番晒

再讲，就算保顿唔专登松章，阿仙奴都够晒条件添食，首先射手亨利、中场阿迪达同右闸沙格拿上场对维拉分别后备入替，证明伤势好番好多，其次队长尹佩斯连续3场入波不特止，暂时仲以19球领先射手榜，有佢孭飞阿仙奴今场赢波容乜易呀