冇“德国美斯”唔紧要，因为仲有香川真司嘛！呢件“极品寿司”上场成功取代马里奥葛斯表现抢镜，今晚有佢带住“蜜蜂兵团”作客实力一般嘅纽伦堡，要开上盘有几难？（有线61及201周六凌晨3:30直播）

多蒙特早前宣布中场新星马里奥葛斯因鼠蹊受伤要抖两个月，本来几令人担心，点知原来惊系多余嘅，冇咗“德国美斯”嘅“蜜蜂兵团”，歇冬后一开咧就取得两连胜，当中日本中场香川真司踢得仲生咗，上场对贺芬咸更梅开二度，赛后佢扬言会全力帮多蒙特卫冕：“我哋唔会理对手系边队，只会专心比赛！”

香川真司上场入2粒

其实多蒙特自从欧联出局后，专心打德甲成功重拾上季嘅霸气，难怪教练高普近日获续约至2016年，仲舍得一次过放走前锋穆罕默德施丹、戴文勒泰历同中场艾斯菲特啦！

对家纽伦堡歇冬后首仗系威系势，主场赢哈化柏林2:0，点知上场作客汉诺威输番0:1，摆明昙花一现。本来佢哋早前由美职冠军洛杉矶银河借得后卫奥马干沙利斯，可惜呢位美国新星首课操练就重伤要抖9个月，打乱晒球队部署，呢场对住多蒙特破到蛋已经有交代咯